Хитой терма жамоаси италиялик таниқли мураббий Марчело Липпи тайинланганидан хабарингиз бор. 68 ёшли мутахассис олдида мураккаб вазифа турибди: терма жамоани Жаҳон чемпионатининг финал босқичига олиб чиқиш. Хитойликлар ҳозирда 1 очкога эга бўлиб туришибди. Жамоа 15 ноябрь куни ўз майдонида Қатарни қабул қилади ва ЖЧ йўлланмаси учун курашиш имкониятини сақлаб қолиш учун рақибини мағлуб этиши талаб этилади. Марчело Липпи ФИФА расмий сайтига берган интервьюсида саралаш босқичидаги бўлажак ўйинлар борасида сўз юритди.

«Биринчи навбатда футболчиларнинг ўзига бўлган ишончини қайтариш лозим. Дастлаб Қатар, сўнгра Жанубий Корея билан ўйинлар кутиб турибди. Мақсадимиз — жаҳон чемпионати йўлланмасини қўлга киритиш. Ишончим комил, мўжиза содир эта оламиз. Агар буни уддалай олмасак ҳам, ўсишга эришишимиз ва келажак учун пойдевор ўрнатишимиз лозим» - дейди Липпи.

Жанговар руҳнинг етишмаслиги
Хитой терма жамоаси анча йиллардан бери ЖЧ саралаш босқичида муваффақиятсиз иштирок этиб келмоқда. Ҳаттоки, терма жамоа сўнгги 3та ЖЧ саралашининг сўнгги босқичига ҳам етиб кела олмаганди. Хитой клуби Осиё чемпионлар лигасида ғолиб чиқди, терма жамоа Осиё кубоги-2015да чорак финалга чиқди, аммо ЖЧ саралашидаги омадсизликлар мухлисларни ҳайрон қолдираётган эди. Липпининг фикрича, биринчи навбатда футболчилардаги мамлакат шарафини ҳимоя қилиш туйғусини кучайтириш лозим.

«Ўша-ўша футболчилар клубда ва терма жамоада бошқача ўйин кўрсатишини тушунмайман. Миллий чемпионат, Осиё чемпионлар лигаси ва қитъа миқёсидаги мусобақаларда футболчилар жуда зўр ўйнашади, аммо навбат терма жамоага келганида улар ўзларига ўхшамай қолишади. Улар термада клубдаги ўйинларининг 40 фоизини ҳам кўрсатишмаяпти. Футболчилар миллий терма жамоа футболкасини кийгандан кейин зиммаларига қандай масъулиятни олаётганини ҳис қилишлари лозим. Спортчи учун мамлакат шарафини ҳимоя қилишдан шарафлироқ иш йўқ».

Италиялик мутахассиснинг фикрича, Хитой терма жамоаси жамоавий ўйин борасида ортда қолмоқда.

«Биз ва бошқа рақиблар маҳорати ўртасида катта фарқ йўқ. Аммо биз майдонда якдил бўлишни ўрганишимиз керак. Ўйинчилар қийин пайтда бир-бирларига ёрдам беришлари керак. Шундай қилсак, биз ҳар қандай рақибга қарши ўйинда кучли жамоага айланамиз. Хитойлик футболчилар аввалги ўйинларда ўзларининг энг яхши формаларидан узоқ бўлдилар, аммо ҳар қандай ҳолатда ҳам уларни аутсайдер деб айтиб бўлмайди. Салбий натижаларга қарамай, ўйинлар тенгма-тенг курашлар остида кечган. Хитой голга тортадиган вазиятларни яратган, рақиблар эса майдонда катта устунликка эга бўлмаган».

Синовдан ўтган футболчиларга ишонч
Липпи «Гуанчжоу Эвергранд» билан Хитой чемпионатида 3 марта ғолиб чиққан бўлса, бир марта ОЧЛда бош совринга эга бўлган. Мураббий эса ўзининг қўлостида ўйнаган футболчиларга терма жамоада ҳам ишонч билдирмоқчи. Липпи Қатарга қарши ўйин учун «Гуанчжоу»нинг етти нафар футболчисини таклиф қилди. Бундан ташқари, фахрий футболчи, 2013 йилда Осиёнинг энг яхши ўйинчиси деб топилган Чжэн Чжи терма жамоага яна таклиф этилди ва сардорлик боғичи унга топширилди.

««Гуанчжоу Эвергранд»нинг 6-7 нафар футболчисини терма жамоага таклиф қилдим, — дейди Липпи матбуот анжуманида. — Улар анча йиллардан бери бир жамоада ўйнаб келишмоқда ва бир-бирларини жуда яхши тушунишади. Қатарга қарши ўйинда ғалаба қозониш биз учун сув ва ҳаводек зарур. Албатта, бошқа клубларнинг кучли футболчилари хизматларидан ҳам фойдаланаман».