«Реал» ҳужумчиси Криштиану Роналду мадридликлар билан шартномасини 2021 йилгача узайтириш расмий маросимида Nike кўзойнагини тақиб келгани учун жаримага тортилиши мумкин, деб хабар бермоқда «Корреспондент.net».

31 ёшли португалиялик футболчининг кўзида муаммо йўқ, у кўзойнакни замонавий аксессуар сифатида тақиб олганди. Криштиану Nike билан умрбод шартнома имзолаганидан кейин АҚШ брендини реклама қилишга уринган, аммо шу йўл орқали муаммога дуч келди.

Гап шундаки, «Реал»нинг расмий ҳамкори Nike’нинг рақобатчиси – Adidas компанияси ҳисобланади. Клуб ва Adidas ўртасидаги келишувга кўра, «Реал» футболчилари расмий тадбирларга бошқа брендларнинг маҳсулотларини кийиш бориши тақиқланган.

Мазкур воқеа Роналдуга, катта эҳтимол билан, молиявий зарар келтиради. Аммо унинг Nike ва «Қироллик клуби»дан йилига 50 миллион евро маош олиши инобатга олинса, йўқотиш катта бўлмайди.