"Андижон" иккинчи давра олдидан молдовалик икки футболчи — ҳужумчи Андрей Бугняк ва ҳимоячи Денис Ильескуни қўшиб олганди. Аммо андижонликлар мавсум якунига кўра Олий лигани тарк этишди.

Ильеску мавсум сўнгига қадар жамоа шарафини ҳимоя қилган бўлса, Бугняк бундан бир ярим ой аввал клуб сафини тарк этганди. Ҳужумчи Moldfootball.com сайтига берган интервьюсида "Андижон"дан кетиш сабаблари ҳақида гапириб берди.

— "Андижон" раҳбарияти ўз ишини яхши бажара олмади. Шундай кунлар бўлдики, биз ўз ҳисобимиздан сафар ўйинларига бориб келдик ва овқатландик. Бундан ташқари, бизга ваъда қилинган пулларни беришмади.

— Клубнинг сиздан қарзлари қолдими?
— Ҳа. Лекин мен у ердан кетдим ва қолган пулни тўлашмаса керак. "Андижон" ҳақида эшитишни ҳам истамайман. Шунчаки ҳужжатларимни олиб кетсам бўлди.

— Ўзбекистонда ўтказган вақтингизда ижобий ҳолатлар ҳам бўлдими?
— Менга кўпроқ "Андижон" мухлислари ёқди.

— Ҳозир ўзингизга янги жамоа қидиряпсизми?
— Қишки таътилни кутяпман, кўрамиз. Хориж клубида ўйнашни истардим.