«Рома» ва «Милан» клубларининг собиқ яримҳимоячиси Урби Эмануэльсон Италия футболига нисбатан салбий фикрларни баён қилди.

Футболчи «Рома», «Милан», «Верона» ва «Аталанта» клубларида ўйнаган эди.

«Италия футболи кўзбўямачиликдан иборат. У ерда дўстларни орттириш ва одамлар ишончини қозониш жуда мушкул. Масалан, Франк де Бур ҳам у ерга мослашиб кетолмади.

Ёшларга тавсиям – Италия клубларига ўтманг. У ерда футбол жуда сиёсатлашиб кетган ва энг яхши футболчилар у ерда ўйнамайди.

«Рома»? Бу нотўғри қарор эди. Мен у ерга ўтган 6 нафар футболчининг бири эдим. Аммо вақтимни захира ўриндиғида ўтказдим. Жамоа худди кўппаклардек ўйнаса ҳам, вазият мен учун ўзгармади. Руди Гарсия мени сабр қилишимни илтимос қиларди. Бироқ ҳар доим бошқа футболчини майдонга туширарди» - деди Эмануэльсон.

Айни пайтда Урби Англия чемпионшипи вакили «Шеффилд Уэнсдэй» клубида ўйнамоқда.