Испания молия вазирлиги «Реал» ҳужумчиси Криштиану Роналдуни солиқлардан бўйин товлаганлиги ҳақидаги хабарларни ўрганиб чиқади ва суриштирув ўтказади.
«Солиқ идоралари зарур бўлган текширув ишларини ўтказишади» - дейилади Вазирлик баёнотида.
Испания молия вазири Хосе Энрике Фернандес Мойя португалиялик футболчига нисбатан олиб бориладиган суриштирув адолатли ва холис бўлиши ҳақида гапирди.
«Испания солиқ идораларида ҳақиқий профессионаллар ишламоқда. Бу суриштирув Испаниянинг бошқа ҳар қандай фуқаросига нисбатан олиб бориладиган иш каби ўтказилади» - деди Мойя.
Эслатиб ўтамиз, 2009 – 2014 йиллар давомида Роналду Британия Виргинияси оролларида рўйхатдан ўтказилган Tollin компанияси орқали 74,8 млн евро даромадни ўтказган ва Испания хазинасига фақат қисман солиқ тўлаганлиги ҳақидаги хабарлар матбуотда эълон қилинганди.
