Бу йил “Металлург” фахрийларидан яна бири – Зоҳид Абдуллаев ўзининг иккинчи ёшлигини бошидан кечираётганлигини исботлади.   У битта мавсумда “Металлург”нинг рақиблар дарвозасига энг кўп гол киритган ўйинчисига айланди. З.Абдуллаев 2016 йилги мавсумда рақиблар дарвозасига 18 та гол киритди ва чемпионат тўпурарлари рўйхатида фақатгина Темирхўжа Абдухолиқовдан ортда қолди холос. Темурхўжа Зоҳидни тўртта тўпга ортда қолдирган бўлса, Абдуллаев ўз навбатида энг яқин таъқибчилари Ш.Норхонов ҳамда С.Мирзаевлардан тўртта тўпга илгарилаб кетди.   Зоҳид Абдуллаевдан ташқари “Металлург” бу мавсум Дилмурод Каримов (8), Муроджон Тошматов (7), Жавоҳир Эсонқулов (4), Аюбхон Нўъмонов (2), Жаҳонгир Абдумўминов (2), Дониёр Одилов (1), Саиджон Абдужабборов (1), Эргаш Исмоилов (1), Исломжон Қобилов (1) ва Жасур Ҳакимов (1) лар ўз номларини таблога ёздириб қўйишди. Яна битта гол “Шўртан” жамоаси ҳимоячиси Ҳасан Эргашев томонидан ўз дарвозасига киритилган – автогол.   Яна Зоҳид Абдуллаев натижаларига қайтадиган бўлсак, унинг олий лига баҳсларида киритган жами голлари сони 67 тага етди. Шулардан 63 голини у “Металлург” жамоаси таркибида рақиблари дарвозасига урган. Тўрт марта эса “Насаф” жамоасида муваффақиятга эришган. Ўзбекистон кубоги баҳсларида ҳам 9 та гол урган Зоҳид Абдуллаев (4 та “Металлург”, 5 та “Насаф” сафида) нинг жами голлари сони 76 тани ташкил этади. Геннадий Красницкий клубига аъзо бўлиши учун Зоҳид рақиблар дарвозасини яна 24 тамра ишғол этиши лозим.