"Қўқон-1912" футболчилари 20 декабрь кунидан бошлаб Қўқондаги “Марказий” стадионда машғулотларни ўтказмоқда.
Машғулотларда мураббийлар асосан футболчиларнинг жисмоний ҳолатларини яхшилашга эътибор қаратмоқда. Ҳозирча "Қўқон-1912" таркибида ўзгаришлар кузатилгани йўқ. Бироқ мураббийлар штаби таркибни кучайтириш мақсадида бир қатор футболчилар билан музокаралар олиб бормоқда.
3 январдан бошланадиган 2-йиғин мобайнида таркибда ўзгаришлар бўлиши кўзда тутилган. Сербиялик легионерлар Дарко Гожкович ҳамда Никола Валентич ҳозирда ўз юртида бўлиб туришибди. Янги йилдан кейинги йиғинларга улар ҳам таклиф қилинган.
Шунингдек бош мураббий бир қатор ёшларга ҳам эьтибор қаратмоқда. Ўринбосарлар таркибида ўйнаган айрим футболчилар ҳам ҳозирда асосий таркиб футболчилари сафига жалб қилинган.
Ўтган мавсумни иккинчи ярмида “Пахтакор” жамоасидан ижарага олинган ярим ҳимоячи Жавоҳир Сидиқов , ижара муддати тугаганлиги сабабли тошкентликлар сафида машғулотларда иштирок этмоқда. Сидиқовни келгуси мавсумда ҳам "Қўқон-1912"га олиб келиш учун “Пахтакор” жамоаси раҳбарияти билан музокаралар олиб борилмоқда. Барчаси ижобий якунланса Жавоҳир Сидиқов ҳам янги йилдан кейинги йиғинларда "Қўқон-1912" сафига келиб қўшилади.
