Ёшлар ўртасида спортнинг якка кураш турларини янада ривожлантириш, жанг санъатини ривожлантириш ва оммалаштириш, улар ўртасида соғлом турмуш тарзини кенг тарғиб қилиш мақсадида жорий йилнинг 24 декабрь куни Андижон олимпия захиралари коллежида “Биз тинчлик тарафдоримиз” шиори остида биринчи вилоят спорт фестивали бўлиб ўтди.
Спорт фестивали вилоят маданият ва спорт ишлари бошқармаси, “Камолот” ЁИҲ Андижон вилоят Кенгаши, барча партияларнинг ҳудудий Кенгашлари ҳамда бир қатор ҳамкор ташкилотлар томонидан ташкил этилди.
Фестиваль иштирокчилари спортнинг таэквондо, каратэ, ушу, қўл жанги, қиличбозлик каби спортнинг якка кураш ва жанг санъати турига мансуб 24 хил йўналишларида дўстона беллашдилар.
Мусобақа давомида спортчилар беллашувларда иштирок этибгина қолмай, ўзларининг спорт йўналишлари бўйича тайёрлаган саҳна кўринишларини ҳам намойиш этдилар.
Ғолибларни тақдирлаш маросимида Андижон вилоят ҳокими Ш.Абдураҳмонов сўзга чиқиб, ғолибларни табриклади.
Фахрли ўринларни эгаллаган жами 72 нафар спортчи ҳамда фаол иштирокчилар тадбир ташкилотчилари ҳамда ҳамкор ташкилотлар томонидан медаллар, диплом ва эсдалик совғалари билан тақдирландилар.
