Мавсум-2016ни омадсиз ўтказган «бургутлар» Олий лигани тарк этди.

Эндиликда жамоа келаси мавсумни Биринчи лигада ўтказади. Бир йилнинг ўзидаёқ яна элитага қайтишни ўйлаётган «Андижон» декабрь ойида қисқа муддатли йиғин ўтказди.

Йиғин чоғида асосан маҳаллий йигитлар иштирок этганини эътироф этиш керак. Боиси асосий таркиб аъзоларининг деярли барчаси ўзларига бошқа жамоа топишга қарор қилишмоқда. Фақатгина ҳозирча Иброҳим Отахонов билан Фарҳод Бекмуротов қолган холос. Улар билан биргаликда асосан ёшлар жамоасида ўйнаган футболчилардир. Шунингдек ортда қолган мавсумни «Обод»да ўтказган андижонлик футболчи Акбар Ходжаев ҳам жамоага қайтиб келди ва йиғинда иштирок этди.

Машғулотларга мураббийлардан Виталий Легай, Расул Раҳмонов ва Қобилжон Олимжонов бошчилик қилди.
Дастлабки йиғин сўнггида мураббийлар «УзТонгХонгКо» (завод жамоаси) билан назорат учрашувини ташкил этиб футболчиларнинг имкониятини кўздан кечириб олди. Баҳсда 3:3 ҳисоби қайд этилди.
«Андижон»: Даврон Жўрақулов, Артур Маматказин, Дилмурод Маҳмудов, Шояд Муллажонов, Акбар Ходжаев, Иброҳим Отахонов, Фарҳод Бекмуротов, Фарруҳ Мирзаев, Жаҳонгир Мақсудов, Алишер Абдувоҳидов, Аваз Олимжонов.
Захирадан тушганлар: Баракатилло Исроилов, Аҳрор Ўктамов, Аброр Комилов, Бахтиёр Қосимов, Сирожиддин Еттибоев ва бир нечта ёшлар.