Ҳужумчи Симоне Дзадза ўзининг "Валенсия"га ўтиши борасида фикр билдирди.

"Валенсия" мени ҳаммадан кўра кўпроқ хоҳлагани учун унга ўтдим. "Валенсия"нинг қизиқишини аввлдан билардим. Англияда майдонга кам туша бошлагач, Испания ҳақида ўйлай бошладим. Жамоа ҳозир инқирозда, унга ёрдам бермоқчиман.

Мени жамоада кўришни Пранделли хоҳлаган эди. У кетгач, бу фақат унинг ташаббуси деб ўйладим, аммо ўша куни кечда клубдан менга қўнғироқ қилишиб, мени сотиб олишни истаётганликларини айтишди.

Англия чемпионати? Бу мен учун қийин давр бўлди. "Ювентус" билан хайрлашганимда келажакка умид билан қарадим. Англияда тариба оширмоқчи эдим, чунки менга уларнинг футболи ёқади.

Аммо ҳаммаси ёмон бошланди. Ўйлашимча, бу ўзимнинг айбим, чунки ҳамма нарсага салбий кўз билан қарадим. "Вест Ҳэм"да ўзимни кўрсата олмаганимдан афсусдаман", - дейди Дзадза.