Мавсумга тайёргарликни Тошкентда ўтказаётган Наманганнинг “Навбаҳор” клуби бугун Бекободнинг “Металлург” клубига қарши навбатдаги назорат учрашувини ўтказди.

Ушбу баҳсда бекободликлар 3:2 ҳисобида ғалаба қозонишди. Ўйиндан сўнг “Навбаҳор” ҳужумчиси Неманья Йованович ўз фикрларини билдирди.

“Металлург”га қарши қийин учрашувни ўтказган бўлсакда мағлубиятни қабул қилиб олдик. Бундай ўйинларда натижа муҳим эмас. Ўртоқлик баҳсларида асосан футболчиларнинг тайёргарлиги қандай эканлиги кўриб чиқилади.

Ҳозирча кунига икки маҳалдан машғулот ўтказяпмиз. Мавсумгача яна бир ярим ой вақт бор. Унгача оптимал формага кириб оламиз, деб ўйлайман. Кўпчилик билади ўтган йилги мавсумни “Қизилқум” жамоаси таркибида якунладим. 4-5 кун аввал “Навбаҳор” жамоаси билан 1 йиллик битимга имзо чекдим. Яқин кунларда “Бухоро” жамоаси билан ўртоқлик ўйини ўтказамиз. Менимча шу билан янги мавсумга чиқиб кетсак керак”, - деди “Навбаҳор” футболчиси Неманья Йованович.