Ямайкалик спринтер Усэйн Болт олимпиадада қўлга киритган олтин медалларидан биридан маҳрум қилинди.
Пекин-2008 олимпиадасининг енгил атлетика мусобақасида, 4х100 метрга югуриш эстафетасида, таркибида Асафа Пауэлл, Майкл Фрэйтер, Неста Картер ва Усэйн Болт бўлган Ямайка терма жамоаси олтин медалларни қўлга киритганди.
Яқинда ўтказилган такрорий допинг таҳлилдан сўнг Неста Картернинг тақиқланган моддани истеъмол қилгани аниқланди ва терма жамоанинг барча аъзоси олтин медаллардан маҳрум қилинди.
«Йиллар давомида оғир меҳнат қилиб, қўлга киритилган олтин медаллардан маҳрум бўлиш оғир... Бироқ бунақаси бўлиб туради, олтин медалларни қайтариш керак бўлса, бу мен учун муаммо эмас» - деди Болт The Guardian хабарида.
Энди машҳур спортчининг ҳисобида 8та олтин медал қолди.
