Сўнгги Паралимпия ўйинларида спортчиларимиз қайд этган натижалар миллионлаб юртдошларимизни қувонтирди.
Паралимпия терма жамоамиз эришган ютуқларга дзюдочилар ўзларининг муносиб ҳиссаларини қўшдилар. Дзюдо термамиз якунда умумжамоа ҳисобида биринчи ўринни эгаллади. Халқаро Дзюдо Федерацияси президенти Мариус Визер ушбу натижани юқори баҳолади ва ташкилот номидан ўзининг эсдалик совғаларини дзюдочиларимизга йўллади.
1 феврал куни Ўзбекистон Дзюдо Федерациясида мазкур эсдалик совғаларни ўз эгаларига топшириш маросими бўлиб ўтди. Совғаларни Ўзбекистон Дзюдо Федерацияси раҳбари Армен Багдасаров ўз эгаларига топширди. Эндиликда, спортчиларимизни олдинда бир қатор маъсулиятли мусобақалар кутмоқда. Ана шундай турнирлар сирасига Паралимпиячилар орасида илк бор ўтадиган Осиё чемпионати ва анъавий тарзда ўтадиган Жаҳон кубоги мусобақалари киради.
– Бу икки мусобақа шуниси билан ажралиб турадики, ҳар икки турнир ҳам Тошкент шаҳри мезбонлигида ўтади. Осиё чемпионати мусобақаси эса биринчи бор ўтказилаётганини қўшимча қилиш керак. Бу икки турнирда 2020-йил Токиода ўтадиган Паралимпия ўйинларида иштирок этиш учун рейтинг очколари ўйналади. Ўйлаймаки, дзюдочиларимиз ушбу турнирларда яхши иштирок этиб, кейинчалик Токиода ҳам кўп бора байроғимизни баландга кўтаришга муваффақ бўлишади - деди Ўзбекистон Миллий Паралимпия Ассосиатсияси Бош котиби Омон Гафуров.
Дарҳақиқат, айнан ушбу мусобақалар 2018-йил Жакартада ўтадиган Параосиё ҳамда 2020-йил Токиода ўтадиган Паралимпия ўйинларида иштирок этиш учун рейтинг балларини йиғишда яхши имконият бўлиб хизмат қилади.
