So‘nggi Paralimpiya o‘yinlarida sportchilarimiz qayd etgan natijalar millionlab yurtdoshlarimizni quvontirdi.
Paralimpiya terma jamoamiz erishgan yutuqlarga dzyudochilar o‘zlarining munosib hissalarini qo‘shdilar. Dzyudo termamiz yakunda umumjamoa hisobida birinchi o‘rinni egalladi. Xalqaro Dzyudo Federasiyasi prezidenti Marius Vizer ushbu natijani yuqori baholadi va tashkilot nomidan o‘zining esdalik sovg‘alarini dzyudochilarimizga yo‘lladi.
1 fevral kuni O‘zbekiston Dzyudo Federasiyasida mazkur esdalik sovg‘alarni o‘z egalariga topshirish marosimi bo‘lib o‘tdi. Sovg‘alarni O‘zbekiston Dzyudo Federasiyasi rahbari Armen Bagdasarov o‘z egalariga topshirdi. Endilikda, sportchilarimizni oldinda bir qator ma’suliyatli musobaqalar kutmoqda. Ana shunday turnirlar sirasiga Paralimpiyachilar orasida ilk bor o‘tadigan Osiyo chempionati va an’aviy tarzda o‘tadigan Jahon kubogi musobaqalari kiradi.
– Bu ikki musobaqa shunisi bilan ajralib turadiki, har ikki turnir ham Toshkent shahri mezbonligida o‘tadi. Osiyo chempionati musobaqasi esa birinchi bor o‘tkazilayotganini qo‘shimcha qilish kerak. Bu ikki turnirda 2020-yil Tokioda o‘tadigan Paralimpiya o‘yinlarida ishtirok etish uchun reyting ochkolari o‘ynaladi. O‘ylaymaki, dzyudochilarimiz ushbu turnirlarda yaxshi ishtirok etib, keyinchalik Tokioda ham ko‘p bora bayrog‘imizni balandga ko‘tarishga muvaffaq bo‘lishadi - dedi O‘zbekiston Milliy Paralimpiya Assosiatsiyasi Bosh kotibi Omon Gafurov.
Darhaqiqat, aynan ushbu musobaqalar 2018-yil Jakartada o‘tadigan Paraosiyo hamda 2020-yil Tokioda o‘tadigan Paralimpiya o‘yinlarida ishtirok etish uchun reyting ballarini yig‘ishda yaxshi imkoniyat bo‘lib xizmat qiladi.
