Тошкентнинг “Бунйодкор” клуби ҳужумчиси Баҳодир Насимов Жанубий Корея қуйи лигаси вакили саналган “Ансан Гринерс” клуби билан шартнома тузди. Бугун барча корейс ОАВ бу ҳақда хабар тарқатди.

Насимов аллақачон клуб ихтиёрига етиб борди ва клубнинг машғулотларига киришди. “Sports Hankook” нашри Баҳодир Насимовнинг фикрларидан иқтибос келтиради:

“Мен бу жамоага келиб қўшилганимдан жуда мамнунман. Жамоадошларим билан танишишга улгурдим. Энди тезда жамоа ўйинига мослашиб, ўзимни кўрсатишни истайман”, — деган Баҳодир Насимов.

Корейс клуби Насимовнинг ўйинларини анчадан буён кузатиб келган. Корейс ОАВ унинг 2015 йилги Осиё Кубогида Жанубий Кореяга қарши ўйинда қатнашганлигини эслаб ўтган ва уни Ўзбекистон терма жамоаси аъзоси деб хабар тарқатмоқда. Шартнома муддати ва футболчиларнинг маоши борасида ҳеч нарсани яширмайдиган маҳаллий ОАВлар Насимовнинг қанча муддатга шартнома тузганлигию маоши қанчалиги ҳақида ҳозирча маълумот тарқатмаган.

Корейс ОАВ асосида Отабек Йўлдошев тайёрлади.