«Бавария» жамоаси сардори Филип Лам ушбу мавсум якунида футболчилик фаолиятини якунлашини маълум қилган. Мюнхенликлар келаси мавсумдан бошлаб ўзларига янги сардор тайинлашига тўғри келади.

Goal нашри эса «Бавария«нинг олдинги сардорларини эслаб ўтди:

Филип Лам – жамоага 1995 йилда келиб қўшилган. 2011-2017 йилларда сардорлик вазифасини ҳам бажарди.

Марк Ван Боммел – клубга 2005 йилда келиб қўшилди. 2008 йилдан бошлаб сардорлик боғичини олди. У буни 2011 йилгача давом эттирди.

Оливер Кан – “Бавария”га 1994 йилда келиб қўшилган дарвозабон 2002-2008 йиллар давомида жамосини сардорлик боғичида майдонга олиб тушди.

Штефан Эффенберг – 1998 йилда мюнхенликлар сафига келиб қўшилган футболчи бир йил ўтар-ўтмас жамоага сардор бўлиб олди. 1999-2002 йилларда ўз вазифасини муносиб бажара олди.

Томас Ҳелмер – клуб сафига 1992 йилда келиб қўшилган Ҳелмер 1997 йилдан 1999 йилгача жамоага сардорлик қилди.

Лотар Маттеус – 1984 йилда жамоага қўшилган Маттеус 1994-1997 йилларда сардорлик боғичини тақди.

Раймонд Оман – 1991-1994 йилларда жамоага сардорлик қилди.

Клаус Аугенталер – ҳимоячи 1975 йилда жамоага қўшилган бўлса, 1984-1991 йилларда сардорлик вазифасини бажарди.

Карл-Ҳайнц Румменигге – 1974 йилдан “Бавария” учун ўйнашни бошлаган немис футболи афсонаси фақатгина 1 йил (1983-1984 йиллар) сардорлик вазифасини ўтаган.

Пол Брайтнер – дунёнинг энг яхши ҳимоячиларидан бири ҳисобланади. Клубга 1970 йилда келиб қўшилган Жаҳон ва Европа чемпиони 1980-1983 йилларда шерикларини сардорлик боғичида майдонга олиб тушган.

Ҳанс-Георг Шварценбек – жамоага 1966 йилда келиб қўшилди. Фақатгина 1979-1980 йилги мавсумда жамоага сардорлик қилди.

Герд Мюллер – жаҳон футболи афсоналаридан бири ҳисобланади. 1964 йилдан жамоа шарафини ҳимоя қилишни бошлаган бўлса фақатгина 1979 йилда оз муддатга жамоасига етакчилик қилган.

Зепп Майер – Жаҳон ва Европа чемпиони ҳисобланади. Дарвозабон мюнхенликлар сафига 1962 йилда келиб қўшилган. 1977-1979 йилги мавсумларда сардорлик боғичи остида ҳаракат қилган.

Франс Беккенбауэр – Либеро (эркин ҳимоячи) амплуасининг асосчиси сифатида кўриладиган немис ва жаҳон футболи афсоналаридан биридир. 1974- йилги Жаҳон чемпиони «Бавария»га 1964 йилда келиб қўшилган. 1970-1977 йиллар оралиғида клубнинг сардори бўлган.

Вернер Олк – клуб афсоналаридан бири. У 1965-1970 йилларда жамоасига сардорлик қилган. Клубга эса 1960 йилда келиб қўшилган.