«Барселона» клуби яқинлашиб келаётган трансфер ойнасида айрим футболчилари бўйича таклифларни кўриб чиқишга тайёр. Бу ҳақда Diario SPORT нашри хабар бермоқда.
Қайд этилишича, «кўк-анорранглилар» ўз ўйинчиларини арзон гаровга сотиш ниятида эмас ва ҳеч қандай чегирмалар қилишмайди. Хусусан, Алехандро Бальде, Жюль Кунде ва Рональд Араухо каби юқори бозор қийматига эга бўлган футболчилар бош мураббий Ханс-Дитер Фликнинг келгуси режаларидан ўрин олган.
Клуб раҳбарияти ушбу ўйинчиларнинг ҳаракатларидан мамнун бўлса-да, агар манфаатли таклифлар тушса, уларни сотиш имкониятини инкор этмаяпти. Манбанинг таъкидлашича, ҳимоячилар орасида жамоани тарк этиши энг эҳтимолли бўлган номзод — Бальде бўлиб турибди. Унинг бошланғич нархи тахминан 50 миллион евро этиб белгиланган.
Эслатиб ўтамиз, «Барселона» айни пайтда Испания Ла Лигасида 33-турдан сўнг 85 очко билан турнир жадвалида яккапешқадамлик қилмоқда. Каталонияликлар энг яқин таъқибчиси — Мадриднинг «Реал» клубидан 11 очкога ўзиб кетган.
