«Манчестер Юнайтед» футбол клуби ҳужумчиси Златан Ибраҳимович америкалик собиқ боксчи Флойд Мейвезер ва UFC чемпиони Конор Макгрегор ўртасида бўлиб ўтиши мумкин бўлган жангга ўз муносабатини билдирди. Швециялик 35 ёшли футболчининг сўзларини Sportskeeda нашри келтирди.
«Мейвезер – Макгрегор драмасидан чарчадим. Улар сафсатани бас қилиб, яхшиси мен билан жанг қилсин. Нима бўлишини бир кўрайлик. Уларнинг ҳар иккисини тўғри шифохонага жўнатаман» - деди Златан.
Флойд Мейвезер ва Конор Макгрегор ўртасида жанг бўлиб ўтиши мумкинлиги ҳақидаги хабарлар UFC чемпиони боксчилик лицензиясини олганидан кейин пайдо бўлди. Ирландиялик жангчи Мейвезер билан жанг учун 100 миллион доллар ишлаб олиш истагини билдирганди.
Кейинроқ Универсал жанглар чемпионати (UFC) президенти Дана Уайт Мейвезер ва Макгрегор жанги учун ҳар икки спортчига 25 миллион доллардан тўлашга тайёр эканини маълум қилган эди.
Маълум муддатдан сўнг Мейвезернинг азалий рақибларидан бири — Мэнни Пакьяо ирландиялик билан жанг қилишга тайёр эканини маълум қилганди.
