Испания чемпионатининг 23-тури доирасида "Реал" ўз майдонида "Эспаньол"ни қабул қилди ва ишончли ғалабани қўлга киритди.
Зидан бу баҳсда асосий таркибнинг бир нечта футболчиларига дам беришга қарор қилди. Мадридликларни 22 январь куни "Валенсия"га қарши қолдирилган учрашув кутиб турибди. Шу боис бўлса керак, жамоа бу баҳсни куч тежаган ҳолда ўтказди, десак хато бўлмаса керак.
Учрашув секин тепмда бошланган бўлса-да, "Реал" босимни ошириб борди ҳамда 33-дақиқада ҳисобни очди. Иско томонидан етказилган узатмани Альваро Мората бош билан дарвозага жойлади.
Иккинчи бўлимда майдон эгалари ҳа деганда рақиб дарвозасига йўл топа олишмади. Бу эса қалтис вазият бўлиб, "Эспаньол" биргина ҳужум орқали ҳисобни тенглаштириб қўйиши мумкин эди. Ўйиннинг 71-дақиқасида майдонга Бэйл тушди ва ўз қайтишини гол билан нишонлади. Баҳснинг 83-дақиқасида "Реал" қарши ҳужум ташкил қилди. Исконинг узатмасидан кейин Бэйл яккама-якка вазиятга чиқди ва олис бурчакни аниқ нишонга олди.
Роналду бу ўйинда ҳам майдонни голсиз тарк этди, аммо унда гол уриш имкониятига эга бўлиши мумкин. Қўшиб берилган дақиқаларда каталониялик ҳимоячи ўз жарима майдончаси ичида Роналду тортиб йиқитди. Мальенко пенальти белгилаш мақсадида қўл билан ишора қилганди, аммо лайнсмен байроғини кўтариб, нотўғри офсайд қайд этди.
Ушбу ғалаба туфайли "Реал" ўз очколарини 53тага етказди ва "Барселона" билан орадаги фарқни 4тага оширди.
Испания Ла лигаси, 23-тур
Реал Мадрид – Эспаньол 2:0 (1:0, 1:0)
Голлар: 1:0 – 33 Мората, 2:0 – 83 Бэйл.
Реал Мадрид – Касилья, Варан, Начо (Марсело, 81), Карвахаль, Пепе, Ковачич (Каземиро, 61), Кроос, Иско, Васкес, Роналду, Мората (Бэйл, 71).
Эспаньол – Лопес, Дуарте, Кариколь, Рейес, Диоп, Хави Фуэго, Лопес Сильва, Хурадо (Васкес, 82), Рейес (Перес, 46), Пьятти, Морено.
Огоҳлантиришлар: Морено (28), Ковачич (41), Иско (48), Хави Фуэго (53), Диоп (68), Кариколь (80), Каземиро (82).
