Осиё Чемпионлар Лигаси–2017 мусобақаси “А” гуруҳи 2-туридан ўрин олган “Локомотив” – “Ал-Аҳлий” (2:0) учрашувидан кейин “темирйўлчилар” бош мураббийи Андрей Микляев ўйин ҳақида ўз фикралрини билдириб ўтди. У билан бирга учрашувдаги биринчи гол муаллифи Самалат Қуттибоев ҳам матбуот анжуманида қатнашди.

“Ўйин натижасидан мамнунмиз. Энди Олий Лига янги мавсумига бемалол тайёрлансак бўлади. Майдонда ҳаракат қилган барча футбочиларга ташаккур айтмоқчиман. Биз бир жамоа бўлиб ўйнадик ва яхши натижага эришдик. Гол ўтказмай ғалаба қозонганимизга қарамай, ҳимоямизда муаммолар бўлди. Аммо йигитлар уларни ўз вақтида бартараф қилди.

Кризо аста-секинг жисмоний ҳолатини яхшиламоқда. У ёш ва етарлича ўйин амалиётига эга бўлади. Агар икки ҳужумчи тактикаси билан ўйнасак, у албатта асосий таркибда ўйнайди. Захира ҳақида гапирадиган бўлсам, яна Икром Алибоевни ёдга олишга тўғри келмоқда. У тезкор футболчи ва унинг йўқлиги билиниб туради. Мурод Бобожонов ва Диёр Туропов ҳам жароҳатда. Шу сабабли асосий таркиб билан баъзида муаммолар юзага келади”, – деди Микляев.  

“Локомотив” бугун ғалаба қозонганидан ва бунга ўз ҳиссамни қўшганимдан хурсандман. Кейинги ўйинларда ҳам оптимал таркибда мана шундай ўйнашда ҳаракат қиламиз. Гол урганим мен учун оддий ҳолатдек кечли, ҳеч қандай ўта эҳтиросларга берилмадим”, – деди Қуттибоев.