Ла Лиганинг навбатдаги турида «Спортинг» Хихонни йирик ҳисобда мағлубиятга учратган «Барселона» келаси мавсумдан янги мураббий қўли остида майдонга тушадиган бўлди.
Каталонияликлар устози Луис Энрике ўйиндан сўнг жамоа билан шартномасини узайтирмаслигини маълум қилди. Фурсатдан фойдаланиб, Goal.com нашри Луис Энрикенинг «Барселона»даги энг ёмон хотираларини тузиб чиқди.
Илк “Эл класико”даги мағлубият – 2014 йил октябрида биринчи маротаба МСН билан майдонга тушган Энрике “Реал”дан илк мағлубиятини қабул қилиб олди. Роналду, Пепе, Бенземанинг голлари эвазига “Реал”нинг дербида қўли баланд келди.
“Атлетик” Билбаода учралган йирик мағлубият (4-0) – Энрике илк мавсумидаёқ жамоаси билан бешта совринни ютиб олди. Агарда жамоа Испания Суперкубогида “Атлетик” Билбаодан енгилмаганида 100 %лик натижа кўрсатган бўларди. Сафарда 4-0 ҳисобида мағлубиятга учраган каталонияликлар ўз уйларида 1-1 ўйнаб олтинчи совринни бой берган эди.
“Селта”дан учралган мағлубиятлар – “Балаидос”да ўтказилган икки учрашувда каталонияликлар ўз дарвозаларидан нақ 8 гол ўтказиб юборди. 2015 йил сентябрида 4-1, 2016 йил октябрида 4-3 ҳисобида Энрике шогирдлари оғир мағлубиятларни қабул қилиб олди.
“Эл класико”даги иккинчи мағлубият – 2016 йил 2-апрел куни мадридликлар бу сафар “Камп Ноу”да ғалаба қозонди. Серхио Рамоснинг майдондан четлатилиб камчилик бўлиб қолганига қарамай, “Реал” якунда “Барселона”ни мағлуб эта олди.
Чемпионлар Лигасида “Атлетико”дан учралган мағлубият – 2016 йил апрел ойида, Чемпионлар Лигаси чорак финал босқичида “Атлетико” Мадрид билан тўқнаш келган Энрике жамоаси икки ўйин якунига кўра 3-2 ҳисобида мағлубиятга учради ва мусобақани эрта тарк этди.
“Алавес”дан учралган мағлубият – Луис Энрике шогирдлари 2016 йил сентябр ойида мусобақа дебютанти “Алавес”дан кутилмаганда мағлубиятга учради. Иккинчи бўлимда Инеста, Месси, Суаресларнинг ўйинга қўшилиши ҳам каталонияликларни мағлубиятдан қутқара олмади.
“ПСЖ”дан учралган йирик мағлубият – Чемпионлар Лигаси нимчорак финал босқичида Парижга мусобақа фаворити мақомида йўл олган Энрике жамоаси парижликлардан қақшаткич зарба қабул қилиб олди. 4-0 ҳисобида мағлубиятга учраган “Барселона” мусобақани бу мавсум ҳам эрта якунлайдиган бўлиб турибди.
