Италиялик мутахассис Клаудио Раньерини истеъфога чиқариб юборган Англиянинг «Лестер» клуби жамоани вақтинча Крэйг Шекспирга ишониб топширганди.

Ўз вақтида Раньерига ёрдамчилик қилган Шекспир бошқарувида «тулкилар» кетма-кет икки учрашувда зафар қучди. Аввалига «Ливерпуль», кейин эса «Халл Сити» 3:1 ҳисобида мағлуб этилди. Раньери раҳбарлик қилаётганида эса футболчилар 2017 йилдаги олти учрашувда битта ҳам гол урмай, 5 тасида имкониятни бой берганди.

Клуб ярим ҳимоячиси Дэниел Дринкуотер бош мураббий излаш ишлари билан банд бўлиб турган «Лестер» раҳбарларига етиб борадиган тарзда фикр билдириб, бу борада Шекспир номзодини қўллаб-қувватлади.

“Биз жамоага ташриф буюрадиган ҳар қандай мураббийни қўллаб-қувватлаймиз. Бироқ клубнинг ҳар бир аъзоси бошқа мутахассисга қараганда Шекспирни яхшироқ билади. Агар асосий вазифа унинг ўзига ишониб топширилса, бу яхши иш бўларди.

Айримларимиз Шекспирни анчадан буён биламиз. Агар у бош мураббий лавозимига расман тасдиқланса, биз Крейгни қўллаб-қувватлаймиз. У ҳозир масъулиятни ўз қўлига олиб, кучи етганича енг шимариб ишламоқда” - деди Дэниел Дринкуотер, «Лестер» аъзоси.

Sportsmole нашрининг ойдинлик киритишича, Шекспирнинг жамоада қолишини қолган футболчилар ҳам бир овоздан қўллаб-қувватлаган.