“Челси” жамоаси бош мураббийи Антонио Конте АПЛ 29-туридан ўрин олган “Сток Сити” (2:1) клубига қарши ўйиндаги ғалабадан сўнг ўз фикрларини айтди.

“Челси” менталитети доимо шундай бўлиши керак. Бу буюк жамоа, шу сабаб биз ҳар бир баҳсда ғолиб чиқишимиз шарт. Ўйлашимча, агар чемпионатни ютишни хоҳласак, ўртамиёна ва аутсайдерларга мағлуб бўлмаслик керак. Асосийси ғалабали юришни сақлаб қолиш. Ғолиблик менталитети айнан шунда намоён бўлади.

Биз жуда муҳим ғалабани қўлга киритдик ва мен шундай қийин ўйинда қўлга киритилган ғалабани футболчилар ҳамда мухлислар билан бўлишмоқчиман. Менинг ўйинчиларим мен хоҳлаган футболни ва мен хоҳлаган ўйин фалсафасини тўғри тушинишади. Шубҳасиз, биз ажойиб ўйин намойиш этмоқдамиз.

Мен ўз шогирдларимга мана шундай меҳнати учун ташаккур айтмоқчиман. Улар ҳар бир ўйинда ўз имкониятларидан юз фоиз фойдаланмоқда ва биз АПЛни ютишимиз мумкинлигини майдонда исботлаяпти. Лекин биз бундан ҳам яхши ўйнашимиз мумкинлигига ишонаман ва биз бундан ҳам яхши ўйнашимиз керак”, - деди Антонио Конте.

Эслатиб ўтамиз, “Челси” 69 очко жамғариб, турнир жадвалидаги энг яқин таъқибчиси “Тоттенҳэм”дан 10 очко олдинда бормоқда.