Бугун Австралиянинг Мелбурн шаҳрида Формула 1 пойгаларининг 2017 йилги мавсум илк расмий пойгалари ўтказилди.

Даставвал иштирокчилар доимгидек саралаш баҳсида ўзаро куч синашишди. Жума куни ва бугун тонгда бўлган амалиёт баҳсларидан сўнг квалификацияда Алберт Парк трассасининг янги рекорди ўрнатилиш ойдинлашган эди.

Саралашда эса бу рекорд расман янгиланди. Мерседес жамоаси аъзоси британиялик Люис Ҳэмилтон 2011-йилда Себастиан Феттел томонидан ўрнатилган рекордни бир сониядан кўпроққ яхшилашга муваффақ бўлди. Ҳэмилтон 1:22.188 вақт қайд этди. Аввалги рекорд 1:23.529га тенг эди. Болидларнинг бу мавсумда анча кучайтирилгани мавсум давомида қолган трассаларда ҳам янги рекордлар қайд этилишига олиб келиши мумкин.

Эртага бўлиб ўтадиган пойгада Люиснинг кейинги поғоналарда Феррари жамоаси аъзоси Себастиан Феттел, 3-поғонада эса Мерседеснинг янги аъзоси Валтери Боттаслар старт олишади. Баҳс анча қизиқарли ўтиши кутилмоқда. Сабаби саралашдан сўнг етакчиларнинг орасидаги фарқ у қадар катта бўлмади.

Саралаш баҳсида мезбон пойгачи Даниэл Риккиардо 3-босқич биринчи уринишда бошқарувни йўқотди ва эртага 10-поғонадан старт оладиган бўлди. Яна бир кутилмаган натижа бу Ҳаас жамоаси аъзоси Роман Грожаннинг квалификациянинг 3-босқичига ўтгани бўлди. Баҳс қизиқарли ва муросасиз ўтиши кутилмоқда.