Bugun Avstraliyaning Melburn shahrida Formula 1 poygalarining 2017 yilgi mavsum ilk rasmiy poygalari o‘tkazildi.

Dastavval ishtirokchilar doimgidek saralash bahsida o‘zaro kuch sinashishdi. Juma kuni va bugun tongda bo‘lgan amaliyot bahslaridan so‘ng kvalifikasiyada Albert Park trassasining yangi rekordi o‘rnatilish oydinlashgan edi.

Saralashda esa bu rekord rasman yangilandi. Mersedes jamoasi a’zosi britaniyalik Lyuis Hemilton 2011-yilda Sebastian Fettel tomonidan o‘rnatilgan rekordni bir soniyadan ko‘proqq yaxshilashga muvaffaq bo‘ldi. Hemilton 1:22.188 vaqt qayd etdi. Avvalgi rekord 1:23.529ga teng edi. Bolidlarning bu mavsumda ancha kuchaytirilgani mavsum davomida qolgan trassalarda ham yangi rekordlar qayd etilishiga olib kelishi mumkin.

Ertaga bo‘lib o‘tadigan poygada Lyuisning keyingi pog‘onalarda Ferrari jamoasi a’zosi Sebastian Fettel, 3-pog‘onada esa Mersedesning yangi a’zosi Valteri Bottaslar start olishadi. Bahs ancha qiziqarli o‘tishi kutilmoqda. Sababi saralashdan so‘ng yetakchilarning orasidagi farq u qadar katta bo‘lmadi.

Saralash bahsida mezbon poygachi Daniel Rikkiardo 3-bosqich birinchi urinishda boshqaruvni yo‘qotdi va ertaga 10-pog‘onadan start oladigan bo‘ldi. Yana bir kutilmagan natija bu Haas jamoasi a’zosi Roman Grojanning kvalifikasiyaning 3-bosqichiga o‘tgani bo‘ldi. Bahs qiziqarli va murosasiz o‘tishi kutilmoqda.