АҚШнинг Флорида штати Майами шаҳрида ATP Masters туркумига кирувчи нуфузли мусобақада 1/16 финал баҳслари бўлиб ўтмоқда.
Жаҳоннинг еттинчи ракеткаси Рафаэл Надал германиялик Филипп Колшрайберга қарши кортга чиқди ва бу баҳс испаниялик ракетка устаси учун фаолиятидаги 1000-ўйин бўлди.
Надал мазкур баҳсни жуда оғир бошлади ва биринчи сетда битта ҳам геймни ўз фойдасига ёзиб қўя олмади.
Лекин қолган икки сетда у устунликни тўлиғича ўз томонига оғдира олди ва 6:2, 6:3 ҳисобида зафар қучиб, юбилей баҳсини ўз фойдасига ҳал қилди. Бу Надал фаолиятидаги 822-ғалаба бўлди.
"Мингта учрашув - бу жуда кўп ва бу яхши. Бу менинг фаолиятим жуда узоқ давом этганидан далолат беради. Мен кўп йиллар давомида фаолиятимни эрта якунланиши ҳақидаги гапларни эшитиб келдим, шунинг учун ҳам бу мен учун муҳим. Ўзимнинг биринчи учрашувимни ҳам яхши эслайман, бу ўз юртим Мальоркада бўлган эди. ATP Masters йўналишидаги биринчи ғалаба - бу катта воқеа", - деди теннисчи.
Эслатиб ўтамиз, Надал Роджер Федерер ва Давид Феррердан сўнг 1000 та матч ўтказган 11-теннисчига айланди.
