Бутунжаҳон бокс серияси (WSB)нинг VII мавсум «C» гуруҳи 5-тури доирасида Ўзбекистоннинг Uzbek Tigers жамоаси 1 апрель куни Тошкентда Қозоғистоннинг Astana Arlans боксчиларига қарши жанг қилиб, 4:1 ҳисобида зафар қучди.
Қаторасига учинчи ғалабани қўлга киритган ўзбекистонлик боксчилар очколари ҳисобини 9 тага етказиб олди. Astana Arlans мағлубиятга учраганига қарамай, 12 очко билан гуруҳ пешқадами бўлиб қолди. Россиянинг Patriot Boxing Team жамоаси 7 очко билан учинчи, Хитойнинг China Dragons боксчилари 3 очко билан тўртинчи ўринда бормоқда.
Фото: WSB
«C» гуруҳидаги сингари «А» гуруҳида ҳам 5-тур учрашувлари якунланди. Мавсум кашфиётларидан бири Colombia Heroicos ўтказилган барча жангларда ғалаба қозониб, 15 очко билан гуруҳда пешқадам бўлиб турибди. Ўтган мавсум чемпиони – Cuba Domadores 13 очко билан иккинчи ўринни банд қилиб турибди. Учинчи ўринда бораётган Caciques Venezuela ҳисобида 4 очко, тўртинчи ўриндаги Argentina Condors’да эса 1 очко мавжуд.
«B» гуруҳи иштирокчилари жами 4 та тур ўтказишга улгурди. British Lionheatrs ва France Fighting Roosters 10 очкодан жамғарган ҳолда 1–2-поғонани банд қилиб турибди. Italia Thunder 7 очко билан учинчи ўринда бораётган бўлса, Morocco Atlas Lions 2 очко билан сўнгги ўринда турибди.
Мусобақа қоидаларига кўра, «А», «B» ва «C» гуруҳида 1–2-ўринларни эгаллаган ҳамда энг яхши кўрсаткичга эга бўлган иккита учинчи ўрин соҳиби кейинги босқичга чиқади.
Демак, «C» гуруҳида Uzbek Tigers сўнгги турда Россиянинг Patriot Boxing Team жамоасига қарши баҳс натижасидан қатъи назар плей-офф йўлланмасини нақд қилиб бўлди. Чунки «А» гуруҳида 3-ўринда бораётган Венесуэла жамоасида сўнгги тур олдидан 4 очко бор. Caciques Venezuela 6-турда ғалаба қозониб, 7 очкога эга бўлса ҳам Uzbek Tigers камида 9 очко билан Венесуэла жамоасидан яхшироқ натижа қайд этиб турибди.
