"Барселона" ғалаба қозониб, жадвал пешқадамига айланиши мумкин бўлган ўйинда мағлубиятга учради. "Малага" номдор рақибга қарши жуда яхши ўйин намойиш қилди ва ҳақли ғалабани қўлга киритди.

Аммо учрашув ҳаками Хил Мансано баҳсни ўта суст бошқарди. Гўёки, у бошқа ўйинни бошқараётгандек тасаввур уйғотди. Учрашув бошидан у назоратни қўлдан чиқариб юборди, баҳсли қарорлар чиқарди. Ҳар иккала дарвоза томон биттадан тоза пенальти белгиламади, "Малага"нинг битта тоза голини инобатга олмади.

Бундан ташқари, Неймар бугунги ўйинга тайёр эмаслиги кўриниб қолди. Ҳам руҳий, ҳам жисмоний жиҳатдан. Унинг ўйини қовушмагани етмаганидек, керакмас вазиятларда сариқ карточкалар олиб, жамоасини қийин аҳволга солиб қўйди.

Учрашув қаҳрамони сифатида "Малага" дарвозабони Карлос Каменини эътроф этиш жоиз. У камида 2та вазиятда Суарес билан юзма-юз вазиятда ҳужумчидан устун келди ва жамоасини муқаррар голлардан қутқарди.

Энрике бошланғич таркибга Жереми Матьёни киритиб, хатога йўл қўйиб бўлганди. Унинг тез югура олмаслиги оқибатида Сандро Рамирес "Барса" дарвозасига дастлабки голни киритди.

Сўнгги дақиқаларда бир киши кам бўлиб ўйнаётган "кўк-анорранглилар" кўпчилик бўлиб олдинга ўтиб кетишди ва иккинчи голни ўз дарвозаларидан олиб чиқишди.

Натижада "Барселона" мағлуб бўлди ҳамда "Реал"дан эса 3 очко ортда қолмоқда. "Қироллик клуби" ҳисобида 1та захира ўйини ҳам борлигини инобатга олсак, Зидан ўз жамоаси Ла лига чемпионлигига бошлаб келиш учун жуда яхши имкониятга эга бўлиб олди.

"Малага" эса ушбу мавсумда "Барса" билан ўйинларда 4 очко ишлашга муваффақ бўлди.

Испания Ла лигаси, 31-тур
"МАЛАГА" -  "БАРСЕЛОНА" 2:0 (1:0)
8 апрель, 23.45, «Ла Росаледа»
Голлар: 1:0 – 32 Сандро Рамирес, 2:0 – 90 Хони Родригес.
Малага – Камени, Эрнандес, Рикка, Росалес, Льоренте, Форнальс, Хуан Карлос (Хони Родригес, 83), Камачо, Ресио, Аньор (Пеньяранда, 67), Сандро Рамирес (Шарлес, 77).
Барселона – тер Штеген, Матье (Серджи Роберто, 46), Умтити, Альба, Маскерано, Андре Гомеш (Пако Алькасер, 61), Бускетс, Денис Суарес (Иньеста, 46), Неймар, Месси, Суарес.
Огоҳлантиришлар: Альба (8), Неймар (27), Умтити (33), Рикка (37), Ресио (45), Пеньяранда (69), Хуан Карлос (82), Маскерано (87).
Четлатиш: Неймар (65).