"Barselona" g‘alaba qozonib, jadval peshqadamiga aylanishi mumkin bo‘lgan o‘yinda mag‘lubiyatga uchradi. "Malaga" nomdor raqibga qarshi juda yaxshi o‘yin namoyish qildi va haqli g‘alabani qo‘lga kiritdi.

Ammo uchrashuv hakami Xil Mansano bahsni o‘ta sust boshqardi. Go‘yoki, u boshqa o‘yinni boshqarayotgandek tasavvur uyg‘otdi. Uchrashuv boshidan u nazoratni qo‘ldan chiqarib yubordi, bahsli qarorlar chiqardi. Har ikkala darvoza tomon bittadan toza penalti belgilamadi, "Malaga"ning bitta toza golini inobatga olmadi.

Bundan tashqari, Neymar bugungi o‘yinga tayyor emasligi ko‘rinib qoldi. Ham ruhiy, ham jismoniy jihatdan. Uning o‘yini qovushmagani yetmaganidek, kerakmas vaziyatlarda sariq kartochkalar olib, jamoasini qiyin ahvolga solib qo‘ydi.

Uchrashuv qahramoni sifatida "Malaga" darvozaboni Karlos Kamenini e’trof etish joiz. U kamida 2ta vaziyatda Suares bilan yuzma-yuz vaziyatda hujumchidan ustun keldi va jamoasini muqarrar gollardan qutqardi.

Enrike boshlang‘ich tarkibga Jeremi Matyoni kiritib, xatoga yo‘l qo‘yib bo‘lgandi. Uning tez yugura olmasligi oqibatida Sandro Ramires "Barsa" darvozasiga dastlabki golni kiritdi.

So‘nggi daqiqalarda bir kishi kam bo‘lib o‘ynayotgan "ko‘k-anorranglilar" ko‘pchilik bo‘lib oldinga o‘tib ketishdi va ikkinchi golni o‘z darvozalaridan olib chiqishdi.

Natijada "Barselona" mag‘lub bo‘ldi hamda "Real"dan esa 3 ochko ortda qolmoqda. "Qirollik klubi" hisobida 1ta zaxira o‘yini ham borligini inobatga olsak, Zidan o‘z jamoasi La liga chempionligiga boshlab kelish uchun juda yaxshi imkoniyatga ega bo‘lib oldi.

"Malaga" esa ushbu mavsumda "Barsa" bilan o‘yinlarda 4 ochko ishlashga muvaffaq bo‘ldi.

Ispaniya La ligasi, 31-tur
"MALAGA" -  "BARSELONA" 2:0 (1:0)
8 aprel, 23.45, «La Rosaleda»
Gollar: 1:0 – 32 Sandro Ramires, 2:0 – 90 Xoni Rodriges.
Malaga – Kameni, Ernandes, Rikka, Rosales, Lyorente, Fornals, Xuan Karlos (Xoni Rodriges, 83), Kamacho, Resio, Anyor (Penyaranda, 67), Sandro Ramires (SHarles, 77).
Barselona – ter Shtegen, Matye (Serdji Roberto, 46), Umtiti, Alba, Maskerano, Andre Gomesh (Pako Alkaser, 61), Buskets, Denis Suares (Inyesta, 46), Neymar, Messi, Suares.
Ogohlantirishlar: Alba (8), Neymar (27), Umtiti (33), Rikka (37), Resio (45), Penyaranda (69), Xuan Karlos (82), Maskerano (87).
Chetlatish: Neymar (65).