2016/2017 йилги мавсум Европа Чемпионлар Лигаси чорак финалининг дастлабки ўйинлари ҳам ўз ниҳоясига етди.

«Ювентус» «Барселона»ни йирик ҳисобда енгган бўлса, «Монако» ва «Реал» Германиядан ғалаба билан қайтди. «Атлетико» эса «Лестер»ни минимал ҳисобда мағлуб этди. Гоал.cом нашри ушбу ўйинларда ўзини оқлай олмаган футболчилар рамзий терма жамоасини тузиб чиқди. Табиийки бу мағлуб жамоаларнинг футболчиларидан тузилган.

«Барселона» дарвозабони Марк-Андре Тер Штеген бир неча сейвларни амалга оширганига қарамай 3 та гол ўтказиб юборди ва улардан бирида унинг айби ҳам бор эди. Шу сабабли германиялик дарвозабон рамзий терма жамоадан ўрин эгаллади. Унинг аргентиналик жамоадоши Хавьер Маскерано эса биринчи бўлимда Бускетснинг ўрнида яхши ўйнай олмаган бўлса, иккинчи бўлимда ҳимояда ҳам етарлича ишончли ҳаракат қилолмади.

Маскеранога ҳимояда икки немис жамоаси ҳимоячилари шериклик қилади. «Боруссия»нинг грециялик ҳимоячиси Сократис Папастопулос майдон марказида ўта қўпол хатога йўл қўйиб, жамоасининг учинчи голни ўтказиб юборишига сабаб бўлди. «Бавария»нинг испаниялик футболчиси Хави Мартинес эса ўзини бошқара олмай қизил карточка олди ва жамоасини қийин аҳволга солиб қўйди.

Яримҳимояда «Лестер»нинг икки аъзоси Марк Олбрайтон ва Кристиан Фукс «Атлетико»га қарши баҳсда ўзларидан кутилган ўйинни кўрсата олмагани билан жой олди. «Боруссия» аъзоси Свен Бендер автогол билан жамоасини оғир аҳволга солиб қўйган бўлса, «Барселона» сардори Андрес Иньеста Буффон билан бирга-бир вазиятни кўкка совуришдан ташқари жамоасининг ҳужумларини ташкиллаштиришда ҳам фаол бўлмади.

Олдинги чизиқда «Барселона»нинг «фантастик» ҳужум учлигинининг икки аъзоси ўрин олган: Неймар ва Луис Суарес. Дарҳақиқат, айнан бразилиялик ва уругвайлик футболчилар ўйин давомида деярли кўринмади ва «Ювентус» ҳимоясига етарли хавф туғдира олмади. Уларга «Лестер» ҳужумчиси Жейми Варди шериклик қилади, зеро у ҳам Мадриддаги ўйинда «йўқолиб» қолди.