Дортмунд полициясининг фикрига кўра, «Боруссия» клуби автобуси олдидаги портлашни диний экстремистлар қилмаган.

Бу ҳақда BBC хабар бермоқда.

Аввалроқ, воқеа юз берган жойдан «Бисмилло...» деб бошланган хат топиб олинган эди. Аммо полициянинг фикрига кўра, бу хат терговни чалғитиш ва айбни диний экстремистларга тўнкаш мақсадида ёзилган.

Хатда Германияни Рамштайндаги авиабазани ёпиши кераклиги ва ҳарбий самолётларни Суриядан олиб чиқиши шартлиги талаб қилинган. Акс ҳолда, спортчилар ва бошқа машҳур инсонлар Германияда бемалол юролмаслиги билан таҳдид қилинган.

Полициянинг фикрига кўра, экстремистлар бундай тарзда музокара ўтказмайди. Ундан ташқари, хат немис тилида гапирадиган инсон томонидан, атайин хатолар билан ёзилган. Бу билан у хатни худди хорижликлар ёзгандек кўрсатмоқчи бўлган.

Эслатиб ўтамиз, Чемпионлар лигасидан ўрин олган «Монако» клубига қарши ўйиндан олдин «Боруссия» Д автобуси олдида портлаш юз берган ва унда ҳимоячи Марк Бартра жароҳатланган эди.