"Барселона" ҳужумчиси Неймарнинг Испания Ла лигасининг 33-тури доирасида "Реал"га қарши ўйинда иштирок этиш эҳтимоли йўққа чиқди.
Marca тарқатган хабарга кўра, Испания футбол федерацияси "кўк-анорранглилар"нинг Неймарнинг дисквалификацияси юзасидан берган апелляциясига рад жавобини берди. Эслатиб ўтамиз, "Малага"га қарши ўйинда футболчи четлатилганидан кейин ҳакамга қараб қарсак чалгани боис, 3та ўйинга четлатилганди. "Реал Сосьедад"га қарши ўйинда Неймар майдонга тушмади. Демак, у "эл-класико"да ҳам иштирок этмайди.
Аммо "Барселона" тасим бўлмоқчи эмас ва ушбу масалада Лозанна шаҳрида жойлашган Спорт арбитраж судига мурожаат қилди. Суд бу масалани "эл-класико" бўладиган кун кўриб чиқади.













