25 апрел куни Париж шаҳрида Формула 1 комиссияси ва стратегия гуруҳлари ўртасида спорт ва техник регламентга ўзгартиришлар киритилиши юзасидан йиғилиш бўлиб ўтди.

Йиғилишда доимий иштирокчилар билан бирга ФИА президенти Жан Тодт ва «Formula One Group»нинг янги ижрочи раҳбари Чейз Кери ҳам иштирок этишди.

Эндиликда Испания Гран Присидан бошлаб, яъни 12-14 майдан эътиборан регламентга ўзгартиришлар киритилади. Унда пойгачилар исми ва болид рақами мухлисларга яхшироқ кўринадиган қилиб ёзилади.

2018 йилда эса техник регламентда ҳам ўзгаришлар бўлади. Яъни Т кўринишидаги қанотлар ёки пойгачилар тилида айтганда "акула сузгичлари"да чекловлар бўлиши кутилмоқда.

Шунингдек, мотор мойини ёқилғи сифатида ишлатиш ҳам ман этилади ва пойга давомида жамоалар фақат бир кўринишдаги мотор мойидан фойдаланишлари мажбурий этиб қўйилади.

Пирелли шиналари эса 2018 йилги ёмғир учун мўлжалланган шиналарга ўзгартиришлар киритиб бориши мумкин.

Агарда пойга давомида баҳс қизил байроқ туфайли тўхтатилса, унда рестарт старт чизиғидан берилади.

Шунингдек, пилотларнинг бош қисмини ҳимояловчи шитлар ҳам тезор такомиллаштирилиб, 2018 йилдан пойгаларда қўлланилиши мумкин.