25 aprel kuni Parij shahrida Formula 1 komissiyasi va strategiya guruhlari o‘rtasida sport va texnik reglamentga o‘zgartirishlar kiritilishi yuzasidan yig‘ilish bo‘lib o‘tdi.

Yig‘ilishda doimiy ishtirokchilar bilan birga FIA prezidenti Jan Todt va «Formula One Group»ning yangi ijrochi rahbari Cheyz Keri ham ishtirok etishdi.

Endilikda Ispaniya Gran Prisidan boshlab, ya’ni 12-14 maydan e’tiboran reglamentga o‘zgartirishlar kiritiladi. Unda poygachilar ismi va bolid raqami muxlislarga yaxshiroq ko‘rinadigan qilib yoziladi.

2018 yilda esa texnik reglamentda ham o‘zgarishlar bo‘ladi. Ya’ni T ko‘rinishidagi qanotlar yoki poygachilar tilida aytganda "akula suzgichlari"da cheklovlar bo‘lishi kutilmoqda.

Shuningdek, motor moyini yoqilg‘i sifatida ishlatish ham man etiladi va poyga davomida jamoalar faqat bir ko‘rinishdagi motor moyidan foydalanishlari majburiy etib qo‘yiladi.

Pirelli shinalari esa 2018 yilgi yomg‘ir uchun mo‘ljallangan shinalarga o‘zgartirishlar kiritib borishi mumkin.

Agarda poyga davomida bahs qizil bayroq tufayli to‘xtatilsa, unda restart start chizig‘idan beriladi.

Shuningdek, pilotlarning bosh qismini himoyalovchi shitlar ham tezor takomillashtirilib, 2018 yildan poygalarda qo‘llanilishi mumkin.