Фарғона вилоятида велоспортнинг шоссе йўналишида Ўзбекистон чемпионати бўлиб ўтди.
Ўзбекистон миллий терма жамоаси учун муносиб ўринбосар спортчиларни саралаб олиш ва иқтидорли спортчиларни аниқлаш мақсадида ташкил этилган мусобақалар юқори даражада ва кенг жамоатчилик иштирокида ўтказилди. Унда Қорақалпоғистон Республикаси, вилоятлар ва Тошкент шаҳридан кўплаб спортчилар иштирок этдилар.
Мусобақанинг биринчи босқичи 20 километр масофага пойга тарзида ўтказилди. Дилмурод Сиддиқов ушбу масофада марра чизиғини биринчи бўлиб кесиб ўтган бўлса, Муроджон Холмуродов иккинчи, Роман Шукуров учинчи ўринни эгаллашди.
100 километр масофага ўтказилган иккинчи босқичда Достон Олломов ғолибликни қўлга киритди. Руслан Каримов иккинчи, Акром Суннатов учинчи ўрин билан чекланишди.
Эътиборлиси Достон Олломов шунингдек, учинчи ва тўртинчи босқичларда ҳам тенгсиз эканлигини исботлаб Ўзбекистон чемпиони номига сазовор бўлди. 132 километр масофани қамраб олган учинчи босқичда Достон айтиб ўтганимиздек, маррага биринчи бўлиб етиб келган бўлса, ундан кейинги ўринларни Руслан Каримов ва Акром Суннатовлар эгаллашди.
Ва ниҳоят, сўнгги тўртинчи босқич 30 айланалик (70 километр масофага) пойгалар бўйича ташкил этилди. Ушбу масофада ғолиб ва совриндорлар қуйидаги кўринишни ҳосил қилди:
1-ўрин. Достон Олломов (Ўзбекистон чемпиони)
2-ўрин. Руслан Каримов
3-ўрин. Акром Суннатов
Мусобақалар кўтаринки рухда ўтказилиб, якунда ғолиб ва совриндорлар диплом ва эсдалик совғалари билан тақдирландилар.
Маълумот учун, 26 апрелдан Наманганда велотрек бўйича эркаклар ва аёллар ўртасида Ўзбекистон чемпионати старт олди. 30 апрелга қадар давом этадиган мусобақада мамлакатимизнинг барча ҳудудларидан спортчилар иштирок этишади.
