«Рома» клубининг 33 ёшли яримҳимоячиси Даниэле Де Росси фаолиятини якунлагач, нима билан шуғулланмоқчи эканини айтди.

«Келажакда ўзимни мураббий сифатида кўрмоқдаман. Мураббий бўлмайман, энди фақат дам оламан деган футболчиларни биламан. Уларнинг кўпчилиги фаолиятини тугатганидан 6 ой ўтгач, С серия клубида бўлса ҳам мураббий сифатида ишлашни хоҳлаб қолмоқда.

Омадим келиб, дунёнинг энг яхши мураббийлари - Лучано Спаллетти, Антонио Конте ва Луисе Энрике билан бирга ишлаганман. Гвардиола билан эса бирга ўйнаганман. Агар мураббий сифатида иш бошласам, унинг машғулотларида қатнашиб, кўп нарсани ўрганмоқчиман» - деди Де Росси Football Italia хабарида.

Эслатиб ўтамиз, футболчининг амалдаги шартномаси шу йил ёзда ўз ниҳоясига етади.