«Малага» президенти Абдулла Ас-Соний «Барселона» ҳақидаги қўпол гаплари учун узр сўради.
«Жамоамиз бош мураббийи Мичелнинг шаънига айтилган ёлғон гаплардан сўнг, мен бу гапларни Каталония матбуотига қарата айтгандим. Чунки уларнинг гапига кўра, мураббийимиз «Реал»га ғалабани тортиқ қилармиш. Бу гаплар ноўрин. «Малага» ўйинларни сотмайди. Аммо гапларим учун узр сўрайман. Агар кимдир бу сўзларни ўзича талқин қилса, бу унинг муаммоси» - деди Ас-Соний.
Эслатиб ўтамиз, айни пайтда «Малага» клубини бошқараётган Мигел Мичел «Реал»нинг собиқ футболчиси ҳисобланади. Яқинда у «Реал»га чемпионлик тилашини, аммо унга қарши ўйинда ғалаба учун майдонга тушишини айтганди. Каталония матбуоти эса «Малага» «Реал»га қаршилик кўрсатмайди деган гап-сўзларни тарқатишганди. Хусусан, бош мураббий Луис Энрике киноя билан: «Малага»нинг ғалабасига умид қилишимиз мумкинми? Агар бувимнинг ғилдираклари бўлганида, у велосипедга айланиб қоларди» - деганди.
Ас-Соний эса твиттерда: «Оллоҳнинг мадади билан «Реал»ни тошбўрон қиламиз. Бироқ, Мичел ҳақидаги ёлғон гапларидан сўнг, Каталония ташландиқлари чемпионлик таъмини тотмагай» - деб ёзган эди.
Шундан сўнг «Барселона» клуби «Малага» президенти Абдулла Ас-Соний устидан тегишли идораларга шикоят қилиши ҳақида баёнот берган эди.
