«Malaga» prezidenti Abdulla As-Soniy «Barselona» haqidagi qo‘pol gaplari uchun uzr so‘radi.

«Jamoamiz bosh murabbiyi Michelning sha’niga aytilgan yolg‘on gaplardan so‘ng, men bu gaplarni Kataloniya matbuotiga qarata aytgandim. Chunki ularning gapiga ko‘ra, murabbiyimiz «Real»ga g‘alabani tortiq qilarmish. Bu gaplar noo‘rin. «Malaga» o‘yinlarni sotmaydi. Ammo gaplarim uchun uzr so‘rayman. Agar kimdir bu so‘zlarni o‘zicha talqin qilsa, bu uning muammosi» - dedi As-Soniy.

Eslatib o‘tamiz, ayni paytda «Malaga» klubini boshqarayotgan Migel Michel «Real»ning sobiq futbolchisi hisoblanadi. Yaqinda u «Real»ga chempionlik tilashini, ammo unga qarshi o‘yinda g‘alaba uchun maydonga tushishini aytgandi. Kataloniya matbuoti esa «Malaga» «Real»ga qarshilik ko‘rsatmaydi degan gap-so‘zlarni tarqatishgandi. Xususan, bosh murabbiy Luis Enrike kinoya bilan: «Malaga»ning g‘alabasiga umid qilishimiz mumkinmi? Agar buvimning g‘ildiraklari bo‘lganida, u velosipedga aylanib qolardi» - degandi.

As-Soniy esa tvitterda: «Ollohning madadi bilan «Real»ni toshbo‘ron qilamiz. Biroq, Michel haqidagi yolg‘on gaplaridan so‘ng, Kataloniya tashlandiqlari chempionlik ta’mini totmagay» - deb yozgan edi.

Shundan so‘ng «Barselona» klubi «Malaga» prezidenti Abdulla As-Soniy ustidan tegishli idoralarga shikoyat qilishi haqida bayonot bergan edi.