«Барселона» яримҳимоячиси Хави «Тоттенҳэм» бош мураббийи Маурисио Почеттино билан юзага келган можаро ҳақида гапирди.

Аввалроқ, The Sun нашрида Хавининг Деле Аллини «Ман Сити» клубига ўтиши ҳақидаги сўзлари чоп этилганди. Шундан сўнг, «Тоттенҳэм» устози Почеттино Хавини ўзига душман деб эълон қилди.

Бироз вақт ўтгач Хави бу гапларни айтганини инкор қилди. The Sun эса, интервьюни уйдирма эканини тан олиб, ҳаммадан узр сўради.

«Ўзимни ноқулай ҳис қилмоқдаман. The Sun уйдирмани чоп этган, Почеттино эса унга ишониб гапирган. Аслида ҳаётда душманим йўқ, футболда ҳам.

Почеттино менга душман эмас. Уни ҳурмат қиламан. Унинг «Тоттенҳэм»и жуда зўр ўйнамоқда, ўйин услуби ҳам менга ёқади. У Англия чемпионатидаги энг яхши мураббийлардан бири. «Барселона»ни бошқаришга номзод ҳам бўлиши мумкин» - деди Хави.