«Barselona» yarimhimoyachisi Xavi «Tottenhem» bosh murabbiyi Maurisio Pochettino bilan yuzaga kelgan mojaro haqida gapirdi.

Avvalroq, The Sun nashrida Xavining Dele Allini «Man Siti» klubiga o‘tishi haqidagi so‘zlari chop etilgandi. Shundan so‘ng, «Tottenhem» ustozi Pochettino Xavini o‘ziga dushman deb e’lon qildi.

Biroz vaqt o‘tgach Xavi bu gaplarni aytganini inkor qildi. The Sun esa, intervyuni uydirma ekanini tan olib, hammadan uzr so‘radi.

«O‘zimni noqulay his qilmoqdaman. The Sun uydirmani chop etgan, Pochettino esa unga ishonib gapirgan. Aslida hayotda dushmanim yo‘q, futbolda ham.

Pochettino menga dushman emas. Uni hurmat qilaman. Uning «Tottenhem»i juda zo‘r o‘ynamoqda, o‘yin uslubi ham menga yoqadi. U Angliya chempionatidagi eng yaxshi murabbiylardan biri. «Barselona»ni boshqarishga nomzod ham bo‘lishi mumkin» - dedi Xavi.