“Ювентус” ва “Монако” клубларининг собиқ мураббийи Клаудио Раньери Европа Чемпионлар лигаси ярим финал баҳсидан сўнг ўз фикрлари билан ўртоқлашди.

“Мен айни пайтда Монакода истиқомат қилябман ва кечқурун “Луи II” стадионига бордим. Учрашув мен учун кучли ҳиссиётга тўла бўлди, зероки мен ҳар икки жамоани бошқарганман. Ҳозирда улар умуман бошқа ўйин услубида ҳаракат қилишади.

“Ювентус” асосий урғуни тактик билим, қатъият, хатосиз ўйин ва тажрибага қаратган ҳолда ўйин намойиш этмоқда, аҳир улар 2015 йил финалда ўйнашган. “Монако”нинг устунлиги ёш ўйинчиларнинг ўзини эркин ҳис этиб ўйин суръатини кескин ўзгартира олишидадир.

Шанба куни “Монако”ни ўз майдонида “Тулуза”дан устун келганини томоша қилдим. Очиғи улар мени ҳайратга солишди. “Ювентус” ярим финалда фаворит бўлиб қолади. Агар ҳаммаси режадагидай бўлса “Ювентус” олға қадам ташлайди ва асосан тажриба эвазига бунинг уддасидан чиқа олади. Мусобақанинг бу босқичида тажриба муҳим аҳамият касб этади. Ўйлашимча “Ювентус” финалда ўйнайди” – дейди Раньери.