Италиялик машҳур мураббий Роберто Манчини ватанидаги мураббийлар мактаби ҳақида гапирди.
Маълумки, «Челси» бош мураббийи Антонио Конте АПЛда ғолиб чиққан италиялик тўртинчи мутахассис бўлди. Ундан олдин Клаудио Раньери, Карло Анчелотти ва Манчини шундай натижага эришганди.
«Менимча, италиялик мураббийлар – дунёдаги энг яхши мутахассислардир. Мураббийларимиз тактика бўйича бошқаларга нисбатан жуда яхши тайёргарликка эга, ҳар доим шундай бўлган. Бу эса италияликларнинг исталган лигада ишлаши мумкинлигини англатади. Тўрт нафар италиялик мураббий АПЛ ғолиби бўлган. Сўнгги 20 йилда 4 нафар инглиз мураббийи бунга эришолмаган. Биз ўзига хос анъанага асос солдик. Ўйлайманки, у давом этади» - деди Манчини Football Italia хабарида.
