Боку мезбонлик қилаётган ва тўртинчи бор ўтказилаётган «Ислом бирдамлиги спорт ўйинлари»да Ўзбекистон делегацияси 1 тадан олтин - кумуш ва 6 та бронза медали билан умумжамоа ҳисобида 7-ўринни эгаллаб турибди.

Пешқадамлик кураши асосан мезбон Озарбайжон (11-9-3) ҳамда Туркия (10-8-10) делегацияси ўртасида кечмоқда. Ўзбекистондан олдинги поғоналарда шунингдек Индонезия, Жазоир, Эрон ва Иордания термалари ҳам бор.

Маълумот учун, «Ислом бирдамлик ўйинлари»да жами 54 мамлакат спортчилари иштирок этмоқда. Рио—2016 Олимпиадасида 4 та олтин, 2 та кумуш ва 7 та бронза медалини қўлга киритган Ўзбекистон делегацияси мана шу 54 мамлакатнинг барчасидан яхшироқ кўрсаткич қайд этганди.

Рио Олимпиадасида асосий медаллар боксчилар томонидан қўлга киритилганди. Бокудаги фестивалга Ўзбекистон бокс федерацияси захира боксчиларини юборганди.