Олий лиганинг 11-туридан ўрин «Бунёдкор» - «Пахтакор» (1:1) ўйинидан сўнг, меҳмонлар бош мураббийи Жасур Абдураимов ўз фикрларини билдирди.

«Биринчи бўлимда тактик ва техник тарафдан хатоларга йўл қўйдик, ўйинимиз ўхшамади. Бунда хатони ўз зиммага оламан. Ёшроқ жамоаларга қарши ўйинларда ўз кучимизга ортиқча баҳо бериб юборяпмиз. Танаффусгача бунга барҳам бера олмадик.

Биринчи бўлимда мезбонлар, иккинчи бўлимда биз устунлик қилдик. Асосий таркибда 13-14 нафар футболчи хизматидан фойдаланяпмиз. Барибир юклама таъсири сезилади. Натижа ўйинга мос деб биламан.

Йигитлар мураккаб вазиятдан чиқиб кетишди. Уларга бунинг учун раҳмат айтаман. Футболчилар ўйинни ўзларига олиши тарафдориман. Ўзбек футболи техник маҳорат эгалари билан машҳур бўлган.

Икки ҳафтада кўп ўзгаришлар қилиш қийин. Биз ўсишга уриняпмиз. Ҳолатимизни яхшилаб боришга интиламиз» - деди Абдураимов.