Тошкент шаҳридаги “Универсал” спорт саройи жорий йилнинг 26-28 май кунлари илк маротаба паралимпия дзюдоси бўйича ташкил этилган ва 2020 йил Токиода бўлиб ўтадиган ёзги Паралимпия ўйинларига рейтинг очколарини берадиган Осиё ва Океания чемпионатига мезбонлик қилди.

Ушбу мусобақада спортнинг ушбу тури бўйича қитъамизда энг кучли саналган давлатлар - Эрон, Жанубий Корея, Ҳиндистон, Ироқ, Тожикистон, Хитой Тайпейи, Таиланд, Қозоғистон ва XV Паралимпия ўйинлари якунларига кўра жаҳоннинг энг кучли жамоаси ҳисобланадиган Ўзбекистон терма жамоалари иштирок этдилар.

Терма жамоамиз аъзолари ушбу чемпионатда 9 та олтин, 2 та кумуш ва 7 та бронза медалларини қўлга киритиб, умумжамоа ҳисобида 1 ўринни эгаллашди. Иккинчи поғонадан 3 та олтин 3 та кумуш ва 3 та бронза медаллари билан Жанубий Корея терма жамоаси жой олган бўлса, Эрон терма жамоаси 2 та олтин 2 та кумуш ва 3 та бронза медалларига сазовор бўлиб, кучли учликка якун ясаб берди.