ФИФАнинг техник директори Марко ван Бастен Конфедерациялар кубоги старти олдидан футболдаги янгиликлар ҳақида гапирди.
"Биз ҳакамлардан уларни футболчилар ўраб олган вазиятларда қаттиққўлроқ бўлишларини сўрадик. Биз буни футболдан йўқотишимиз керак.
Яна бир муҳим мавзу - ўйин вақтининг узайтирилиши. Биз жароҳатлар, алмаштиришлар учун кетадиган аниқ вақт ҳисобини ўрнатмоқчимиз. Ҳозирда бу кўпинча, биринчи бўлимга - 1 дақиқа, иккинчи бўлимга - 3 дақиқа кўринишида бўлмоқда. Аммо йўқотилган дақиқалар вақти бундан кўпроқ. Ҳатто голни нишонлаш ҳам кўп вақтни олади.
Дарвозабонлар тўпни ўйинга киритишдан аввал уни кўп ушлаб қоладилар. Бу ўйин вақти ҳисобига бўляпти. Биз ҳакамларга дарвозабонлар тўпни 6 сониядан ортиқ ушлаб турмаслик қоидаси ҳали ҳам борлигини эслатдик.
Биз видеоёрдамчи системасини (VAR) ва экстра-таймларда тўртинчи алмаштиришни синаб кўрмоқчимиз. Мақсад - VAR системасини Россияда ўтадиган Жаҳон чемпионатида қўллаш", - дейди Ван Бастен.
