«Милан» клуби дарвозабон Жанлуижи Доннарумма билан янги шартнома имзолашга яна бир бор уриниб кўради.
Il Giornale хабарига кўра, айни пайтда 18 ёшли дарвозабон Польшада ўтказиладиган Европа чемпионатидаги Италия ёшлар терма жамоаси қароргоҳида бўлиб турибди. "Россонери" спорт директори Массимилиано Мирабелли у ерга ташриф буюриб, дарвозабонни янги шарномага имзо чекишга кўндирмоқчи.
Аввалроқ, футболчининг агенти Мино Райола «Милан» билан имзоланадиган шартномада, агар клуб Чемпионлар лигасига чиқолмаса, футболчининг товон пули 10 млн евро қилиб белгиланишини талаб қилган эди. Мана шу ҳолат туфайли томонлар келишувга эришолмади ва шартнома имзоланмай қолди.
Доннарумманинг амалдаги меҳнат битими 2018 йил ёзида ўз ниҳоясига етади.
