Камерун терма жамоаси бош мураббийи Уго Броос КК-2017 мусобақасида Чили термасидан учралган мағлубиятга (0:2) шарҳ берди.

Учрашувда бош ҳакам икки марта видеотакрорга мурожаат қилди - биринчисида чилиликларнинг голи бекор қилинди, иккинчисида уларнинг голи ҳисобланди.

"Ўйин бошида чилиликлардан бироз ҳайиқдик, деб ўйлайман. Жуда кучли жамоага қарши ўйнашимизни билар эдик. 20-дақиқагача учта гол ўтказишимиз мумкин ди, омадимиз келди. Ҳисобга қарамай, иккинчи бўлим яхши ўтди. Чилиликлар биринчи имкониятлариданоқ фойдаландилар. Натижадан афсусдамиз, аммо ўйиндан қониқдик.

Бугун икки марта видеотакрордан фойдаланилди. Бу муҳим нарса бўлса керак. Биринчисида яққол офсайд бор эди. Бу факт, шунинг учун гол ҳисобланмади. Аммо ўйин давомида бундан бир неча марта фойдаланилса, бундан яхшилик чиқмайди.

Варгаснинг биринчи голида нимани ҳис қилдим? Афсусландим, аммо ҳакам видеотакрорга мурожаат қилганини кўриб, офсайдга умид қилдим. Бу голни ҳисоблашмагани - омадимиз бўлди", - дейди Броос.