Ўзбекистон миллий терма жамоаси бош мураббийи Самвел Бабаян Конфедерациялар кубоги мусобақасини кўриш учун Россияга йўл олди.
Бабаянга бирорта ҳам ўзбекистонлик футболчи тўп сурмайдиган Конфедерациялар кубоги нега керак бўлиб қолгани ва у мусобақанинг қайси ўйинларини томоша қилиши борасида аниқ маълумотлар йўқ.
Қайд этиш керак, эртага — 21 июнь куни Халқаро пресс-клуб Ўзбекистон миллий терма жамоаси мураббийлари ва ЎФФ раҳбарияти иштирокида анжуман ташкил қилишни режалаштирганди. Бабаян ўша анжуманда иштирок этиш учун етиб келадими ёки йўқ — ҳозирча аниқ эмас.
Самвел Бабаян мураббийлик қилаётган Ўзбекистон миллий терма жамоаси ЖЧ—2018 саралашининг ҳал қилувчи босқичида 8 та ўйин ўтказиб, шуларнинг тенг ярмини бой берди ва 12 очко жамғаришга муваффақ бўлди. Бунгача қониқарсиз натижа қайд этган Жанубий Корея, Қатар ва Хитой термаларида бош мураббийлар истеъфоси кузатилган бўлиб, фақатгина ЎФФ саралаш цикли якунига қадар Бабаянга ишонишга қарор қилганди.
