Ўзбекистон олимпия терма жамоаси 23 ёшгача бўлган футболчилар ўртасидаги Осиё чемпионатига саралаш баҳсининг иккинчи ўйинини ўтказди. Равшан Ҳайдаров шогирдларига бу сафар Непал термаси қаршилик қилди.

Баҳснинг 21-дақиқасида Достонбек Турсунов ҳисобни очишга муваффақ бўлди. Ўйин давомида катта устунлик ўзбекистонликлар томонида бўлса-да, вакилларимиз яратилган имкониятлардан фойдалана олишмади. Фақатгина учрашув тугашига 10 дақиқа қолганида захирадан майдонга тушган Азизжон Ғаниев Ўзбекистоннинг иккинчи голига муаллифлик қилди.

"D" саралаш гуруҳида иштирок этаётган БАА U22 терма жамоаси Ливанга қарши баҳс олиб бориб, кичик ҳисобда ғалаба қозонди. Мезбонлар ўйин тугашига 6 дақиқа қолганида пенальтидан ғалаба тўпини киритишди.

БАА ва Ўзбекистон термалари ҳисобида 6 очко мавжуд. Амирлик термаси тўплар фарқига кўра гуруҳда 1-ўринни эгаллаб турибди. Эртага, 19 июль куни икки терма жамоа ўзаро тўқнаш келади. Эслатиб ўтамиз, 10та саралаш гуруҳлари келаси йили Хитойда ўтадиган Осиё чемпионати йўлланмасига эга бўлади. Шунингдек, гуруҳларда 2-ўринни эгаллаган жамоалар орасида 5таси (ёки 6та — агар мезбон Хитой саралашда ОЧга йўлланма берадиган ўринни эгалласа)га қитъа чемпионати йўлланмаси берилади.

ОФК U23 саралаш, 2-тур
НЕПАЛ - ЎЗБЕКИСТОН - 0:2
Голлар: Достонбек Турсунов (21), Азизжон Ғаниев (80)

ЛИВАН - БАА - 0:1
Голлар: Ал-Ҳашмий (84-пенальти)